Homazhet filluan nga Dollogozhda

Dita e Dëshmorëve, 5 Maji, u shënua në mbarë vendin, duke filluar nga Struga, me vizitat dhe homazhet që u bënë në varrezat e fshatit Dollogozhdë, pranë varrit të Nuri Mazarit-Komandant Struga, dhe martirit Islam Veliu. Me këtë rast u bënë homazhe dhe u vendosën lule të freskëta mbi varrin e tij, nga familjarët e Nuri Mazarit, bashkëluftëtarët e tij, shokët, miqtë, autoritetet e komunës së Strugës, nga SHVL-ja, dhe bashkëvëndasit e tij. Të pranishëm në këto homazhe, ishin edhe kryetari i SHVL, deputeti Fazli Veliu, kryetari i Komunës dhe kryetari i Këshillit të Komunës së Strugës, Ramiz Merko, etj.

Kryetari i SHVL-së, Fazli Veliu, në fjalimin e tij për jetën dhe veprën e Nuri Mazarit, ndër të tjera theksoi se Nuri Mazari, ishte ndër të parët në Kosovë, për çlirimin e Kosovës, në shumë beteja të lavdishme të UÇK-së, në Kosovën Lindore-Preshëve-Bujanoc e Medvegjë, dhe ishte ndër të parët, për të qenë i pari edhe në radhët e Ushtrisë Çlirimtare Kombëtare në Maqedoni. “Nuri Mazari, luftoi për të çliruar viset e okupuara, për liri dhe të drejta të plota e të barabarta të shqiptarëve. Nuri Mazari luftoi për bashkimin dhe unitetin e shqiptarëve. Ai luftoi dhe u angazhua për bashkim, afrim dhe unitet, dhe gjatë këtyre përpjekjeve, dhe duke afruar e pajtuar njerëzit. Ai luftoi që Struga të jetë shqiptare, që shqiptarët të jenë të lirë, të barabartë dhe të gjitha ato për të cilat luftoi Mazari, Struga sot i gëzon, në këtë ditë të 5 Majit, që është edhe ditëlindja e Nuri Mazarit”, tha mes tjerash Fazli Veliu. Më pas homazhe u bënë edhe pranë varrit të martirit Islam Veliu, të rrëmbyer nga policia dhe forcat paramilitare maqedonase, për të përfunduar tragjikisht nga duart vrastare paramilitare. Trupi i pajetë i Islam Veliut, ishte gjetur në një shpellë, në afërsi të Kërçovës. Më tej karvani vazhdoi rrugën drejt Kërçovës, Gostivarit, Tetovës dhe vendeve të tjera, për të bërë homazhe në varrezat e dëshmorëve. Mehmet LATIFI 'Gazeta Lajm